Һозурлиниватқиниңиз 19 йилдин буйан иштийақ билән ишләнгән әмгәкниң мевиси болсиму, у толуқлиниватқан нусхиси болғачқа, техичә түзитиш һәм толуқлаш басқучида турмақта.шундақтиму, тордиму ишләткили болидиған мукәммәл бир уйғурчә-инглизчә луғәтни тезликтә түзүп чиқиш зөрүрийәт болғачқа, барлиқ әмгәкни түгитип болғандин кейин елан қилғандин көрә дәсләпки нусхисини елан қилип турушни лайиқ таптуқ. Түзитиш вә тамамлаш хизмити җәрйанида ишләткүчиләр билән түзгүчиләрниң пикир алмаштурушиға қолайлиқ болиши үчүн бир мунбәр ечилди. Мунбәргә тәклип пикир, тәвсийә вә тәнқидләрни әвәртишиңизни қарши алимиз, чүнки уларсиз луғитимизниң мукәммәл болиши мумкин әмәслики сизгә ениқ.

Бу қетим сизгә тәқдим қилидиғанлиримиз 70,120 уйғурчә сөзлүк, түркий тиллардин башқа мәнбәдин киргән сөзләрниң етимологийәлик мәнбәси, созуқ тавушларниң тәләппуз қилғандики узун қисқилиқ көрсәтмиси вә мумкин болидиған инглизчә тәрҗимисини өз ичигә алиду.

Луғәтгә киргүзүлгән уйғурчә сөзләрниң көпинчиси һазирқи заман уйғур тилиға кириду. Қәдимки уйғур тилидики сөзләр(болупму классик йаки чағатай текистлиридин тепилған сөзләр) пат арида қәдимки һәм һазирқи йезилишлирида қошулиду.

Уйғур тарихи, җуғрапийәси вә мәдәнийитигә аит толуқрақ учурларни өз ичигә алған қисми түзүливатиду. Оқурмәнләр вә қизиққучилар мунбәр арқилиқ өзлириниң төһбилирини униңға қошалайду.буларниң һәммиси аваз вә рәсимлик cd нусхсиға, һәм нәширйаттин чиқмақчи болған басма нусхисиға қошулиду.

Уйғур латин йезиқидики қисми йеқинқи бир нәччә йилдин буйан интернетта мунтизимлашқан uky да йезилди. Издәш рамкисиға uky да хәт киргүзсиңизму болиду. Издимәкчи болған сөзни ләйлимә конупка тахтиллиридин пайдилинип уйғур әрәб йезиқи йаки уйғур славйан йезиқида киргүзсиңизму болиду(кейинкиси мустәққил дөләтләр бирләшмә гәвдисидики оқурмәнләрниң тәлипини қандуруш үчүн қошулди). Уйғурчә сөзләрниң имласини киргүзгәндә шинҗаң уйғур аптонум райунлуқ тил-йезиқ комитетиниң қаидиси (гәрчә бәзи йетәрсизликләр болсиму) асас қилинди.

Бу луғәт дәсләптә уйғурчидин инглизчиға тәрҗимә қилишқа пайдилиқ болиши үчүн түзүлгән, бирақ уни тәтүр йөнилиштиму ишлитишкә болиду. Издәш көзникидики инглизчә текист киргүзүш рамкисиға инглизчә сөзләрни киргүзүп мас һалдики уйғурчә тәрҗимисини тепишқа болиду.

Луғәтниң лайиһисини Rahmanjan Duval әпәнди түзгән вә барлиқ сөзләрни топлап тәбир бәргән ; Waris A. Janbaz әпәнди лазимлиқ йумшақ деталларни түзгән вә луғәтниң дәсләпки түзүш қисминиң ахирқи басқучлирида нурғунлиған сөзлүкләрни тәминлигән ; Tim Reilly әпәнди тор луғити йасаш тоғрисида пикир бәргән вә уйғурчә луғәт түри синақ бекитини сехилиқ билән йасиған һәм башқурған. Қилған әҗримиз сода түсини алмиған болғачқа ишлитиш һәқсиз. Әмма сиз ишлитиватқан бу нусхисиниң апторлуқ һоқуқи бар болуп қанун тәрипидин қоғдалған. Башқиларниң әмгәк мевисидин пайдилинип сахтипәзлик қилидиған кишиләрдин иһтийат қилиш үчүн, һәр күни әң көп издәш чәклимиси 100 сөзгә бекитилди.